2009年6月17日是我人生中最重要的一天...因為我離開了地獄.

話說我上星期四11/6去到西環某某consultant 2nd interview.朋友都說見得都應該請..心情真係好興奮.

呢份工係我2月尾 1st in 之後一直無消息...2月至6月間..我SEND左有20封求職信,但只係in左3間公司,比我好成績一點的同學又或者差唔多的同學,都IN左差唔多十間或以上,一比之下,真係幾灰.

第一間IN就係西環這間.本來聽到佢咁有機會請都幾開心,一來人工唔差,二來都算係我的2nd Choice.但就係就係前一日,星期三10/6,我in左我的1st choice-沙田的某某consultant.當日我遲到左5min...written test又答得一般般..但我interview的表現真係幾好,除左普通話果part差一點之外,其他都好OK.我都有D信心佢會請我....就係因為我覺得沙田會有機會請,所以我就拿西環果間同佢比...一比之下,人工又差一點,坐車又用多成個鐘一程.所以當我收到西環果間的offer時,我真係百感交集,一來終於有人請我好開心,二來我擔心沙田果間請我的時候唔知點搞....所以我向西環果間提出6月22日先返工,希望可以等到沙田果間有消息先再決定....但阿SIR講左句.."我係等人用先請人JAR."..所以無法子之下我15/6正式返工.

返工前一晚,詩班的周年音樂會,成晚都好hyper,訓唔著,第二朝又好早起身,話晒係大學生涯後的新開始,父母同朋友見我返工都好開心支持我...我心想..一定要做好呢份工

可惜......我真係太天真了.

返工第一日,6月15日...有2個同學同我一齊1st day,但唔同team. 聽HR同事講左一陣,就帶我地上去Office.一去到我等同事安排我的坐位...真係好可怕,部腦個keyboard同張檯都封晒塵,本來係有人坐的,但我就臨時坐住先...HR問"咁阿邊個坐邊啊?"..阿SIR話:"佢唔會返來GA LA".

我一坐低,連個位都未坐暖,我的seinor就俾左一大堆圖我改....呢個senior用佢的神速開左一次我要改的CAD圖的位置,講左兩句,問我expect係consultant做打算幾點走..我話8,9點.佢話同我的想像都重有距離....就去左同我旁邊的師姐傾計...又話自己D野好急用,但...就同其他人吹水.....我呆左..

改圖改圖...一邊改,佢就一邊俾D新圖我...我LUNCH之後,同學都過來問我點解咁多野做....我改完啦,阿senior又俾D新的我改.....改到6點半..同學都一個個走...7點半,阿Chris都走埋..我一邊改一邊問..."點解人做GE,我做GE,我要咁辛苦".當時我老豆打來...問我放工返去食飯未....我真係好傷心...我一家人,等個仔第一日收工,開開心心返去興祝食飯...我只可以係電話講...我未走得.

終於去到9點.....我頂唔順,阿senior走埋來話呢埋圖好有問題,佢就話佢一邊mark有乜錯,我一邊改................我果一刻真係要爆發啦..我再做落去我會發狂..我一邊抖大氣,個腦一邊出現詩班AP的歌,一邊忍著眼淚去做,師姐見我咁就話:"人地第一日返工,唔好咁對嚇人啦."...senior就話"咁你走啦.."

我一出office...我真係想哭,大佬,我第一日返工,乜野都唔識,你咁做同叫個新兵唔帶槍去打仗無分別wo..我當晚已經同朋友講..我一定要走.

第二日6月16日,我的自我保護程式開動..senior掉D野過來的時候,我真係火都出晒咁問,"可唔可以等我做晒頭先D野先啊?"...佢的回答係:"排住隊先jar,我唔覺有乜問題wo.."

最好笑的係...我改完的野打算俾佢睇下岩唔岩啦...佢一句飛埋來:"D咁minor的野唔洗俾我睇ga la...我下下咁睇邊有時間啊?"

為左生存...我第二日一定要早走...所以我做完野之後,等到七點多就同senior講做完了.當佢想俾新野我做的時候就話"我可以明天先做嗎?"...

佢話:"咁你聽日先做啦."呢句係我同佢的對話中最有人性的一句.

第二日晚...我都係好想走,但又擔心搵唔到工....朋友都叫我想清楚先走...我一直都覺得沙田果間有機會請我的..但一來佢話要等2,3個星期,二來係真係唔firm.....我打去問一些之前返過西環呢間做placement的同學,個個都話我係咁唔好彩入左公司最忙果team,又跟正最有問題的果組人,重要咁岩係入tender,重要係跟最有問題,最cheap的果個senior...重聽人講星期六,日都應該要返去做野的時候.......我都唔知點搞.但當我知道原來之前summer已經有人同我一樣的時候,我就同自己講:"人地都面對到,無理由我唔得!"

第三日,6月17日,我帶左我果隻日本買返來,價值$150的eva杯同一隻扭蛋返公司..因為我同上帝講:"若然呢個係你的旨意,係對我最好的,我一定會盡心盡力做好佢."..

呢一日的早上,senior仍然係咁走過來俾野我做...我笑晒咁回應佢,我都發現...我其實係學緊野,只係之前2日未適應....當日我決定同我的teammate食飯,話晒都可能會一齊做同事幾年,食下lunch都好應該的...成朝心情一轉變,我都開始覺得我應該可以係西環呢間公司支撐下去的時候..

我午餐後一返到公司...我就收到電話...

"我地係XXXXX打電話來,之前你來過我地度interview,我地決定出個offer俾你......"

我一收到電話...好似聽到天使的聲音...要接我走了...我當然一口應承.

我的senior剛剛就落左site,我就好自由咁...去打過電話俾HR同佢講要辭職...佢要我補返封信,我就立即上yahoo搵左封sample,完成之後就去同我的groupleader講..

我的groupleader有兩句說話我好記得..

"係唔係太忙啊?都係阿XXX用得你太盡....我都話用人唔可以咁的.佢返來我話下佢."

"其實...呢一行,做耐左,間間都差唔多咁忙,但...其他公司一定有適應期俾D新人的.你唔洗咁快就對呢行灰心的,都唔洗覺得唔好意思.我祝你搵到份更好的工."

呢個leader真係好....多謝你.

今天回想起來...返工呢3日真係令我明白到對上帝真係要有信心,還有要全心信靠.當我知道無論如何都要面對的時候,我心情一轉,盡力去做....上帝的旨意就來到了.

我雖然只係in左3間...但有2間都請我..重要係我的1st Choice.

---------------------------------------------------------------------------------------------

2009年5月13日我已經在blog中寫了以下的預言....而家成就左,我一定要講返出來.

我問到點解到今天我都重未有offer?連interview都係得一個...

祂說:"時機未到"

我就問什麼是時機未到?

今天心中的靈說了一句:"「一鼓作氣,再而衰,三而竭，彼竭我盈」..第一輪interview強者太多,你同佢地比,會比下去.但再過一輪,到今次成績出左,你就在那一輪的人當中為最強的一群,那就是時機."

我問到..這是我自己和自己講野嗎?

祂說:"我如路燈,是領你回家的人."

---------------------------------------------------------------------------------------------

成個process...同我當年入degree好似.詳情可到以下網頁.
http://whkn2.xanga.com/514085815/--3172006/

但今次係更大的神蹟. 我更明白佢的旨意.

上帝真係屈機,佢的旨意更超過我地所求所想.

願榮耀都歸予寶座上的羔羊.